لە پێناوی بوونە دەنگی مێژووی خۆمان، ناوەندێکی تایبەت بە ژنان جێی بایەخە. ئاشکراکردن، کۆکردنەوەی زانیاری و بەڵگە و پاراستنی کەلتوری ونبووی ژن لە ژێر زەبری کلتوری زاڵی پیاوسالاری دا، بەرپرسیارێتیەکی مێژووییە لە ئاست نەوەکانی ئایندەدا. تەنانەت لە ڕۆژی ئەمڕۆدا لیست(بیبلۆگرافیا)یەک نیە نوسراوی ژنانی کوردستانیی یان بەرهەمەکانیان لەخۆوە بگرێت. پێویستیەکی زۆر بە کۆکردنەوە و توێژینەوەی ئەزمونەکانی ژنانی ڕۆژهەڵاتی ناوەڕاست و بەتایبەتی ژنانی کوردستانیی هەیە کە ئەڵقەیەکن لە نێوان پەرەسەندنی شارستانی لە قۆناغەکانی ڕابردووەوە تا ڕۆژی ئەمڕۆ. وێرای ئەوەش، پێویستیەکی زۆر بە زەمینەیەکی دامەزراوەیی هەیە بۆ ڕۆچوون بە ڕیشەی بوارە ڕۆشەنبیری و زانستییەکان دا و هاندانی ژنانی گەنجیش بۆ ئەنجامدانی توێژینەوە، نوسین و بەرهەمهێنان. ئامانجی ناوەندی ئەرشیف، توێژینەوە و پەرتووکخانەی ژنی کورد پڕکردنەوەی بۆشاییەکی گرنگی تێکۆشانی ژنی کوردە وەک ناوەندێکی یادەوەری و توێژینەوەی زانستی کە ژنانی کورد، ڕۆژهەلاتی ناوەڕاست و جیهان بگەیەنێتە یەک.
بێگومان ئەو ئامانجانە واوەترە لە کاروباری کتێبخانە و ئەرشیفکردنێکی جێگیر، وەک لە ناوەکەیەوە دیارە خزمەت بە ئامانجێکی هەمەلایەنەی جیاواز دەکات کە پشت بە ژنانی رۆژهەلاتی ناوەڕاست سەر بە زمان و ئەتنیکی جیاواز دەبەستێ، بە تایبەتی ژنانی کوردستان، لەسەر سێ ستون شێوە دەگرێت؛
١/ ئاشکراکردنی واقعی هەمەلایەنەی ژن بە ؛ بوونە ناوەندێکی توێژینەوە و پەروەردە لەسەر بنەمایەکی زانستی بزوێنەر کە هەوڵی بەرزکردنەوەی وشیاری ناسنامەی ژنی ئازاد دەدات لەبەرامبەر بەو زهنیەتەی ژن پەراوێز دەکات و وەک نەبوو حسابی بۆ دەکات. بۆ دامەزراندنی جێیەکی بەیەکگەیشتن کە ژن بتوانن گفتوگۆ لەسەر ژیان، خەون و کێشەکانیان بکەن.
٢/ دەبێتە کتێبخانەیەک بۆ خوێندنەوە، سەیرکردن و گوێگرتن لەو کارانەی تێکۆشان، بەرهەم، کەلتور و مەعریفەی ژنان لە ڕابردووەوە تا ڕۆژی ئەمڕۆ لە کوردستان نیشان دەدات، ئەو بەرهەم و توێژینەوانەی لەسەر ژنان نوسراوە و لە لایەن ژنان خۆشیانەوە نوسراوە.
٣/ دەبێتە ناوەندێکی یادەوەری و ئەرشیف کە نەک تەنیا بەڵگە نوسراو، بینراو و بیسراوەکانی تێدا کۆبکرێتەوە بەڵکو دەبێتە جێیەک بۆ کۆکردنەوەی بوارەکانی کەلەپوری زارەکی هەر لە چیرۆک، گێڕانەوە، دەنگبێژی، لاوانەوە و شرۆڤەکردنیان و بەو پێیە ژنان ڕایەڵەیەکی بەهێز و ڕاستەوخۆ لەگەڵ مێژوویان فەراهەم دەکەن.
ناوەندی ئەرشیف، توێژینەوە و پەرتووکخانەی ژنی کورد کە لە سلێمانی دەست بە کاروباری دامەزراندنی کراوە، پرۆژەیەکە لە ڕوانگەی ژنۆلۆژیەوە بۆ پێکهێنانی ئەو پێویستی و بەرپرسیارێتیە. جوگرافیای کوردستان لە نێو سنوری دەوڵەتانی دەسەڵاتداردا پارچەکراوە و سەردەمێکی درێژیشە لە نێو بەرداشی پارچەبوونێکی کلتوری و سیاسیدایە. لەو سۆنگەیەوە زۆر گرنگە ناوەندێک دامەزرێت کە لە ڕێی دیدێکی نەتەوەییەوە پارچەبوونی سەپێنراو بەسەر کورد دا تێپەڕێنێت، شاری سلێمانیش کە هەم بە ناسنامەی ڕۆشەنبیرییەوە دەناسرێت و هەم بە خانەخوێیی بۆ ژنانی هەرچواربەشی کوردستان، وەک یەکێک لە گونجاوترین شارەکان لەقەڵەم دەدرێت.